Os Premios Paraugas cumpren dez anos destacando os mellores proxectos do sector do márketing e a comunicación de Galicia. Para celebrar esta décima edición regresan a Ferrol cunha gala o 21 de novembro na que a industria lucirá os mellores proxectos feitos no último ano. Unha noite para amosar como o sector revoluciona a creatividade da comunidade, impulsa as súas empresas e crea riqueza cultural e económica.

O Clúster da Comunicación de Galicia organiza o certame, que busca poñer en valor a calidade do traballo feito desde a comunidade, así como enxalzar a función da creatividade, o deseño, a edición, o márketing, a comunicación e os eventos como medio para aumentar a competitividade e a capacidade de innovación. 

Novos premios para un sector cambiante

Na súa décima edición, os Premios Paraugas adáptanse a un novo contexto do sector, máis transversal, integrado e cambiante, simplificando as categorías, incorporando criterios transversais e equilibrando o peso entre disciplinas con maior representación. Deste xeito entregaranse un total de dez galardóns e cinco Premios Especiais, ademais dos Premios Honoríficos a persoas destacadas do ámbito da comunicación e creatividade. As bases pódense consultar na web oficial dos premios e as candidaturas poden enviarse ata o 23 de outubro.

Os galardóns especiais son o Premio Galicia Calidade, destinado a distinguir un anunciante, axencia ou proxecto revelación; o Premio ao Anunciante do Ano, que recoñece unha aposta sostida pola comunicación e o márketing; e o Premio Paraugas de Ouro, considerado o maior recoñecemento do evento e reservado á candidatura máis sobresaínte. Nesta edición, o certame aposta por visibilizar ás novas xeracións co Premio Paraugas Novos Talentos e permitir a participación cidadá a través do Premio Paraugas do Público. 

As categorías deste ano inclúen o Premio Paraugas á Mellor Produción Gráfica, Premio Paraugas á Mellor Solución de Deseño, á Mellor Idea Creativa, á Mellor Campaña Publicitaria, á Mellor Estratexia de Márketing, á Mellor Acción de Branding, á Mellor Estratexia Global de Comunicación, á Estratexia máis Eficaz e ao Mellor Evento Profesional ou Corporativo e ao Mellor Evento Cultural, Gastronómico ou Musical. 

Con esta edición, os Premios Paraugas consolidan o seu compromiso por destacar o talento creativo galego e promover proxectos que combinen innovación, calidade e impacto social. Os X Premios Paraugas contan con patrocinio da Xunta de Galicia, Concello de Ferrol, Autoridade Portuaria de Ferrol-San Cibrao, CESUGA e Estrella Galicia.