Flúor 2024, un éxito en Pontevedra do que se fixeron eco os principais medios de comunicación

Aínda coas emocións a flor de pel e inmersos nunha resaca de ensinanzas e de recordos, podemos afirmar que a VI edición do Congreso Flúor foi un auténtico éxito. Pontevedra foi o escenario dun encontro de profesionais do márketing, da comunicación e da publicidade co obxectivo de pór en valor o traballo realizado na nosa terra xa que, tal e como relatou Marta Ferro, vocal do Clúster da Comunicación de Galicia e CEO de Closet Comunicación nunha entrevista para a TVG: “en Galicia facemos moi bos produtos publicitarios e de márketing, pero temos moito que traballar no xeito de contar o ben que facemos as cousas”.

O congreso congregou a máis de 600 persoas, un evento no que se falou de creatividade da man de profesionais de traxectoria nacional e internacional como Luis Bassat, Andy Stalman ou Toni Segarra. A Intelixencia Artificial, un termo moi importante xa no día a día dos profesionais do sector, ocupou, do mesmo xeito, unha parte esencial da reflexión sobre o futuro da profesión xa que se trata de “unha ferramenta que é ‘humanizada’ por nós mesmos, cando nos proporciona a información”, según destacou Andy Stalman no seu relatoiro.

Ademais de todo iso, Flúor foi un espazo para aprender, no que estudantes de colexios e de universidades galegas como a de Vigo, co Grao en Publicidade e RRPP no seu campus de Pontevedra, e a de Santiago de Compostela, co Grao en Xornalismo, participaron en talleres para coñecer as últimas ferramentas do sector e crear espazos de reflexión sobre a situación actual da publicidade, do márketing e da comunicación. Algo moi necesario, según sinalou Marta Ferro na súa entrevista para a TVG: “para que os novos talentos se empapen de coñecemento e que, aínda que saian a estudar fóra de Galicia, saiban que poden traballar na casa”. 

Co foco aínda posto nas xeracións que están a piques de aterrizar no sector, o Flúor 2024 puxo en marcha o Speed Dating entre empresas e estudantes. “Unha iniciativa do Clúster da Comunicación de Galicia que trata de conectar ós novos talentos coas empresas que traballan na industria”, segundo as palabras de Ferro para A Revista da TVG durante o transcurso do Congreso.

Pero Flúor no só foi un éxito no que se refire a relatoiros, talleres e iniciativas, o Congreso é xa un evento consolidado en Pontevedra que atrae á cidade tanto a profesionais galegos como a empresas de toda España, unha evidencia da que se fixeron eco medios de comunicación autonómicos, nacionais e especializados do sector. De este xeito, publicáronse 65 noticias en medios dixitais, 16 reportaxes en prensa escrita, 1 en radio e 3 entrevistas nos medios audiovisuais.