O pasado venres comezaron os Obradoiros de Dixitalización: “Exploración de tecnoloxías DATA a través do adestramento práctico”, unha iniciativa financiada polo IGAPE e deseñada especificamente para empresas do sector da comunicación.

O Clúster da Comunicación de Galicia organiza estes obradoiros, que teñen un enfoque eminentemente práctico, co obxectivo de axudar ás persoas participantes a explorar e aplicar ferramentas de intelixencia artificial (IA) e business intelligence (BI) nos procesos e decisións das súas empresas. Ademais, cada entidade participante recibirá un diagnóstico individualizado con recomendacións adaptadas á súa situación.

O pasado venres Juanjo Milla, CEO de MILMOH, presidente de ANBAN e asesor do Ministerio de Transformación Dixital, e Gerardo Estévez, director de ELIGE Plus e coordinador do programa, con máis de 200 proxectos de transformación estratéxica en Galicia, impartiron o Obradoiro práctico de IA.
Nos seguintes obradoiros, que tratarán sobre BI e a xornada de diagnóstico e valoración do proxecto, participará tamén Alejandro G. Morgade, socio responsable de BI en ELIGE Plus, con máis de 100 implantacións en empresas e administracións galegas.

O Clúster da Comunicación de Galicia busca con este proxecto mellorar as capacidades dixitais das empresas galegas do sector, así como detectar oportunidades colectivas para impulsar proxectos sectoriais transformadores.